Bag-ong buhatan sa Mayor ug Bise Mayor gisubhan dungan sa kasaulugan sa atong kagawasan.

Ang lungsod sa Opol pinanguluhan ni Mayor Jayfrancis Bago miduyog sa pagsaulog sa ika-125th Philippine Independence Day niadtong June 12, 2023 nga gipahigayon sa Opol Boardwalk nga gisalmutan sa opisyales, mga empleyado sa lungsod, mga opisyales sa kabarangayan, volunteers, mga magtutudlo sa DepEd ug mga beterano natong katiguwangan nga mga nagdala usab ug mga butang agig halad sa pagsaulog sama sa sinelas, biskits ug candies aron usab ipang apud apud sa atong mga kaigsoonan nga nanginahanglan labi na didto sa kabukiran pinaagi sa Serbisyong Bago. Gipaabot usab ni Mayor JDB ang iyang pasalamat sa tanang migahin sa panahon sa pagtambong aron handumon ang atong kagawasan nga naangkon gikan sa pagsakop sa mga langyaw.

Human sa hamubo nga programa gipahigayon usab dayon ang pag blessing sa duha ka bag-ong buhatan sa mayor ug bisi mayor nga gigahinan kinig kantidad nga dul-an sa unom ka milyon nga gikan sa 20% Development Fund 2022 sa Mayor ug General Fund sa Sangguniang Bayan. Tuyo sa mayor ning maong proyekto nga mahatagan ug katawhay ang atong mga kaigsoonan nga adunay katuyuan sa nasangpit nga mga buhatan. Si Rev. Father Richard Miculob sa simbahang katoliko ang nangulo sa seremonyas.

Danilo Paraguya

Edwin Tabilon/Andy Garsuta/Dina Grace Daga