PLEB Orientation and Lecture Series alang sa mga personahe sa kapulisan sa lungsod.

Sa unang higayon ilawom sa pamunuan ni Mayor Jayfrancis Bago nagpahigayon ang Sangguniang Bayan ug pagbansay-bansay nga gitambungan sa mga miembro sa Opol Municipal Police Station. Mao kini ang pagpalab-as sa mga kapulisan ang kabahin sa People’s Law Enforcement Board. Ang PLEB mao ang administratibong opisina kung diin dunggon, imbestigahan ug desisyonan ang sumbong nga ipasaka sa mga yanong lungsoranon batok sa mga abusado ug tiwaling miyembro sa PNP. Ang legal nga basehan sa PLEB pinasubay sa Department of Interior and Local Government (DILG) sa mithi sa RA 6975 o ang DILG Act of 1990, RA 8551 o ang Philippines National Police Reform Act of 1998, RA 10924 o ang General Appropriations Act of FY 2017, NAPOLCOM Memorandum Circular 2016-002, Local Budget Circular No. 73 dated January 10, 2001 ug ang General Guidelines for the Implementation of the Program Capacity enhancement for the People’s Law Enforcement Board. Matud pa ni Mayor Bago nga walay lugar ang mga salbahis nga pulis sa PNP. Busa ang PLEB adunay krusyal nga papel sa pagbunglay sa mga bugoy nga pulis ug tabangan nga magpabilin nga bootan ang mga maayo nga miembro. Sa maong panagtigum naghatag sa ilang pamulong si Atty, Karla Cabrera (miembro sa PLEB)ang kabahin sa “PLEB Orientation” ug si Atty. Reese Oguis ang kabahin sa “Anti-Violence against Women & Children Act of 2004”.

Gitambungan ang maong pagbansay-bansay nila ni SB Member ug PLEB Vice Chairperson Roland Alfeche, Mr. Samy Igloria, representante isip principal sa elementary school ug ni PMaj Michael Salvador Lacasan nga maoy hepe sa maong estasyon sa kapulisan. Nahitabo ang panagtigum kaniadtong Pebrero 23, 2023 diha sa AudioVisual Room sa Opol Community College.

Lalang Rago

Andy Garsuta