Istasyon sa Opol Gihukman isip Best Municipal Police Station

Ang Opol Municipal Police Station (MPS) ubos sa pagdumala ni Police Major (P/MAJ) Michael Salvador R. Lacasan, Officer-in-charge (OIC), gipasidunggan isip Best Municipal Police Station atol sa kasaulogan sa 120^th Police Service Anniversary niadtong Oktubre 21, 2021 didto sa Police Regional Office 10 in Camp 1LT Vicente G. Alagar, Cagayan de Oro City.

Personal nga gitunol ni Philippine National Police (PNP) Chief Police General Guillermo Lorenzo T. Eleazar ang Award of Recognition isip pag-ila sa istasyon sa Opol sa maayo nga pagdumala ug pagsuporta niini sa misyon sa PNP diha sa pagpatuman sa balaod, pagpugong sa mga krimen, pagmintinar sa kahusay ug kalinaw, ug pagsiguro sa kaluwasan ug seguridad sa publiko.

Sa susamang adlaw usab gipahigayon ang pagpirma sa Deed of Donation alang sa 1,512 square meters nga lote nga gidonar sa lokal nga panggamhanan sa Opol ngadto sa Opol MPS.

Si Municipal Mayor, Hon. Maximino “Max” B. Seno mipadangat sa iyang kalipay sa nasakmit nga pasidungog sa atong kapulisan. Siya miingon nga garbo ug dungog kini sa lungsod tungod kay nakita ug gipabilhan sa kaulohan ang aktibong suporta sa mga pulis dinhi sa atong komunidad. #

 PCpl. Kathy Jane P Ejano

Linowafo O. Epanes