Opolanong Kabataan Alang sa Nasud ug Kinaiyahan

Agi og paghatag bili sa atong kinaiyahan, ang Opolanong kabatan-onan mipahigayon sa nagkadaiyang kalihokan aron sa pagpanalipod, pagdumala ug pagpalambo niini.

Niadtong Hulyo 7, 2021, ang mga personahe sa Opol Municipal Police Station (MPS) ubos sa pagdumala ni Police Major (P/MAJ) Michael Salvador R Lacasan, Officer-in-charge (OIC) sa Opol Municipal Police Station (MPS), nagpahigayon og poster making contest didto sa Fish port, Brgy. Luyong Bonbon.

Uban sa Philippine National Police-Maritime Group (PNP-MARIG) nga girepresentahan ni Police Staff Sergeant (PSSgt.) Edgardo Nabua, Assistant Boat Captain, nagmabungahon ang maong indigay nga gisalmotan sa mga miyembro sa Kabataang Makadagat (KAMADA) ug sa Kabataan Kontra Droga at Terorismo (KKDAT).

Ubos sa temang “Ang Nag-iisa at Magkaka-ugnay na Karagatan at Kapuluan ng Pilipinas ay Ipinagtatanggol at Itinataguyod ng Nagkakaisa at Pinag-uugnay na Kabataang Pilipino – Mula sa Basura, Polusyon, Paninira, Pananakop at iba pang Banta,” tumong sa maong kalihokan nga magiyahan ang atong kabatan-onan sa paghatag og suporta sa mga adbokasiya sa PNP diha sa pagsumpo sa problema sa ilegal nga droga ug terorismo sa komunidad ug ilabi na sa pagpreserbar ug pag-atiman sa atong natural nga kahinguhaan.

Samtang niadtong Hulyo 24, 2021 pinaagi sa Municipal Environment and Natural Resources Office (MENRO) pinangunahan ni Engr. Randolph Q. Hallasgo, gipahigayon ang pagtanom sa 30 ka seedlings didto haduol sa bag-ong Brgy. Hall sa Brgy. Taboc kauban ang Taboc Youth Club pinangulohan ni Mr. Mikhael Juhaer C. Simban.

Niadtong Agosto 21, 2021 nananom usab og 150 ka narra seedlings didto sa Brgy. Bagocboc kauban ang kabatan-onan sa maong barangay pinangunahan sa ilang Sangguniang Kabataan (SK) Chairperson, Hon. Segundino Y. Magrina, Jr. inubanan ni Punong Barangay (PB), Hon. Pepe D. Langala. Anaa usab nga misalmot ang Team Sprocket Malanang; Malanang SK Chairperson, Hon. Valdexter O. Salomon, ug  Police Major (P/MAJ) Michael Salvador R. Lacasan, Officer-in-charge (OIC) sa Opol Municipal Police Station (MPS).

Si Municipal Mayor, Hon. Maximino “Max” B. Seno mipaabot sa iyang pasalamat sa aktibong pagsalmot sa kabataang Opolanon ug sa dugang, siya midasig nga ipadayon ang pagpakita sa modelo nga pamatasan. Sa pahayag usab ni Sangguniang Bayan (SB) Member, Hon. Jann Guillmore “Janboy” G. Actub siya nanghinaot nga magmalungtaron ang pagpasiugda sa urban greening nga mga inisyatibo sa matag barangay. #

 PCpl. Kathy Jane P. Ejano ug Amy A. Legaspi

Hon. Juliette T. Uy