LGU-Opol Miduyog sa Philippine Environment Month

Agi og pagsaulog sa Philippine Environment Month ning tuig, ang Lokal nga Panggamhanan sa pagpangulo ni Municipal Mayor, Hon. Maximino “Max” B. Seno mipahigayon sa nagkadaiyang kalihokan aron sa pagpanalipod, pagdumala ug pagpalambo sa atong kinaiyahan inubanan sa temang “Sama-samang Pagkilos, Sama-samang Paghilom: Ikaw, Ako, Tayo ang Kalikasan.”

Pinaagi sa Municipal Environment and Natural Resources Office (MENRO), gipahigayon niadtong Hunyo 3, 2021 ang pagpananom og kahoy didto sa Makaluesa Reforestation Area, Brgy. Patag ning lungsod diin 50 forest seedlings ang natanom sa mga boluntaryo gikan sa Brgy.Taboc.

Samtang niadtong Hunyo 10, 2021 sa koordinasyon sa mga opisyal ug mga myembro sa Opol General Parents-Teachers Association (GPTA) Federation nga gipangulohan ni Mr. Joenel Abella, gibuhat ang pagpananom og kahoy didto sa Sitio Nahulugan, Brgy. Malanang ning lungsod kauban si Sangguniang Bayan (SB) Member, Hon. Elizabeth Y. Tangub.

Ang amahan sa lungsod mipaabot sa iyang pasalamat ngadto sa tanang mipaabot sa ilang oras, suporta, ug aktibong kooperasyon.

Siya midugang nga magpadayon ang LGU sa pagpalapad sa kasayuran sa katawhan mahitungod sa kinaiyahan ug sa pag-awhag sa ilang dugang partisipasyon diha sa hiniusa nga mga paningkamot alang sa kaayohan sa kinaiyahan.

Kadumdoman nga ang bulan sa Hunyo gideklara nga Philippine Environment Month pinaagi sa Proclamation No. 237 nga gipirmahan niadtong 1988 ni kanhi Presidente Maria Corazon “Cory” C. Aquino. #

  Engr. Randolph Q. Hallasgo