Drug-cleared Barangays Gideklara

Alayon sa Barangay Drug-Clearing Program (BDCP), gisalang ang kabarangayan sa Bagocboc, Patag, ug Awang sa usa ka Regional Oversight Committee hearing pinaagi sa usa ka virtual meeting niadtong Mayo 31, 2021.

Ang maong komite gilangkuban sa Department of Health (DOH), Department of the Interior and Local Government (DILG), Philippine National Police (PNP) ug Philippine Drug Enforcement Agency (PDEA) nga maoy nangulo sa pagpamatuod ug pagsusi sa gikinahanglanon nga mga dokumento aron madeklara nga drug-cleared ang usa ka barangay.

Ang matag komitiba sa kahusay ug kalinaw sa naingon nga mga barangay ang maoy mitubag sa mga pangutana mahitungod sa mga dokumento nga gisumite ngadto sa komite.

Mipaambit sa ilang presensya ug suporta sila si Municipal Administrator, Ms. Alona M. Guigayoma; Municipal Local Government Operations Officer (MLGOO), Ms. Marlene M. Pahunang; Chief of Police, Police Major (PMAJ) Ian G. Borinaga; ug Police Corporal (PCpl.) Kathy Jane P. Ejano sa Opol Municipal Police Station (MPS).

Anaa usab gikan sa Municipal Health Office (MHO) si Mr. Efren A. Daayata, Jr. ug ang tulo ka mga Punong Barangay (PB) sa nasangpit nga mga barangay nga mao sila Hon. Pepe D. Langala, Hon. Hermito B. Laid, Jr., ug Hon. Joselito A. Legaspi.

Sa katapusan, gikalipay og dako sa maong mga barangay ingon man usab sa Lokal nga Panggamhanan sa Opol pinangunahan ni Municipal Mayor, Hon. Maximino “Max” B. Seno nga nadugangan pa ang drug-cleared barangays dinhi sa lungsod ug sa dugang, siya nanghinaot nga tiunay na nga mamahimong usa ka drug-cleared municipality ang Opol. #

  Malyn B. Lumacad