Month of the Ocean Gisaulog sa Lungsod

Atol sa kasaulogan sa bulan sa kadagatan ning tuig, gipahigayon ang pagpananum sa bakhaw didto sa Sitio Malingin, Igpit ning lungsod niadtong Mayo 29, 2021.

Dinasig sa United Nations Decade of Ocean Science for Sustainable Development ug inubanan sa temang “The Science We Need for The Ocean We Want,” ang Lokal nga Panggamhanan sa pagpangulo ni Municipal Mayor, Hon. Maximino “Max” B. Seno pinaagi sa Municipal Environment and Natural Resources Office (MENRO), nakigtambayayong sa Opol Municipal Police Station (MPS) ubos sa pagdumala ni Chief of Police, Police Major (PMAJ) Ian G. Borinaga alang sa pagpahigayon sa nasangpit nga kalihokan.

Misalmot usab ang Field Training Program (FTP) Batch 2020-04, Kabataan Kontra Droga at Terorismo (KKDAT), Barangay Peacekeeping Action Team (BPAT) sa Brgy. Igpit, ug uban pang mga boluntaryo.

Mapasalamaton ang amahan sa lungsod sa pagduyog sa maong barangay pinangunahan sa ilang Punong Barangay, Hon. Eliezer A. Vacalares, Jr.

Sa dugang, si Mayor Seno miingon nga ipadayon ug lig-onon pa sa LGU ang mga lakang sa pagkonserbar, pagprotektar, ug malungtarong pagdumala sa atong kadagatan ug marine resources alang sa kaayohan sa katawhang Opolanon.

Kon atong madumdoman, gipagawas niadtong 1999 ang Presidential Proclamation No. 57 ni kanhi Presidente Joseph “Erap” E. Estrada nga nagdeklara sa Mayo isip Bulan sa Kadagatan. #

 Engr. Randolph Q. Hallasgo