Down Syndrome Awareness Day Gipangunahan sa PDAO

Marso 23, 2021 giduyogan sa Lokal nga Panggamhanan sa Lungsod sa Opol pinangunahan ni Municipal Mayor, Hon. Maximino “Max” B. Seno ang selebrasyon sa Down Syndrome Awareness Day nga gipahigayon didto sa 2^nd floor, Opol Public Market, Brgy. Taboc.

Pinaagi sa Persons with Disability Affairs Office (PDAO) ubos sa Municipal Social Welfare and Development Office (MSWDO), nagmalampuson ang mga kalihokan nga naka-angkla sa tema ning tuig nga “CONNECT.”

Sa maong adlaw, gipadayag og samot sa LGU ang paghatag og higayon nga makiglambigit ug makighigala ang atong mga lumolupyo nga adunay Down Syndrome.

Dako usab ang pagtahod sa atong LGU sa mga Opolanon nga adunay Down Syndrome, sa ilang mga pamilya, ug mga higala nga kanunay nakiglimbasog aron mapalapdan ang kahibalo sa publiko mahitungod sa Down Syndrome.

Si Mayor Seno miingon nga adunay hinungdanong papel sa atong komunidad ang tanan. Sa dugang, siya miingon nga ipadayon sa panggamhanan ang mga lakang sa pagpalig-on sa komunidad sa Opolanon nga adunay Down Syndrome ug sa pagdasig kanila nga makiglambigit sa bug-os nga pagsalig sa ilang mga kaugalingon isip hingpit nga mga miyembro sa atong katilingban.

Sa panayam usab kang Sangguniang Bayan (SB) Member, Hon. Jann Guillmore “Janboy” G. Actub, siya miingon nga iyang pagatutokan nga maseguro nga ang tanang Opolanon nga adunay Down Syndrome adunay patas nga koneksyon, kalambigitan, ug suporta gikan sa LGU.

“Atong paningkamotan nga mahatagan og tingog ug patas nga katungod ug oportunidad ang Opolanon nga adunay Down Syndrome,” siya midugang.

Sa katapusan, mapasalamaton ang LGU-Opol sa tanang nagpaluyo niini nga kalihokan ug nangita og bag-ong mga pamaagi aron makapaambit og mga ideya, kasinatian, ug kahibalo taliwala sa nagpadayong pandemya. #

✍ Ethel Rae Callo-Reyes

📷 Opol MSWDO; Opol DAP; Opol PDAO