Juana Laban sa Pandemya: Kaya!

Ang tibuok bulan sa Marso maoy National Women’s Month diin gisaulog ang mahinungdanong tahas ug papel sa kaabayen-an sa komunidad inubanan sa temang: We Make Change Work for Women.

Kini nga selebrasyon usa usab ka higayon aron mahisgutan ug matubag ang mga isyu nga padayon nga giatubang sa atong kababayen-an.

Sa lokal nga lebel, gipangunahan ni Municipal Mayor, Hon, Maximino “Max” B. Seno ang kasaulogan sa Opolanong kababayen-an niadtong Marso 8-12, 2021 pinaagi sa Municipal Social Welfare and Development Office (MSWDO).

Lainlaing kalihokan ang gihimo aron mahatagan og atensyon ang aktibo nga pagsalmot sa kababayen-an sa atong lungsod. Uban niana ang pagtuki sa mga hagit nga dala sa pandemya ug ang padayon nga paghatag og oportunidad sa atong kababayen-an.

Sa unang adlaw gipahigayon ang motorcade ug pasiuna nga mga kalihokan nga gisundan sa usa ka forum mahitungod sa human immunodeficiency virus (HIV) / acquired immunodeficiency syndrome (AIDS) kauban si Ms. Liberty L. Pabilona gikan sa MSWDO. Anaa usab nga mipakigbahin sa Anti-Violence Against Women and their Children Act of 2004 kun Republic Act (R.A.) No. 9262 si Police Corporal Bridgette Joy I. Briones gikan sa Opol Municipal Police Station (MPS).

Sa gipahigayon nga Women’s Assembly, mihisgot bahin sa Gender Equality si MSWDO, Ms. Marlina A. Alo. Anaa usab isip mga mamumulong sila si Ms. Ann Jennifer Lagrosas, Presidente sa Provincial Federation of Women Association (PROFEWA) – Kalipunan ng Liping Pilipina (KALIPI) sa Misamis Oriental ug si kanhi bise-gobernador sa lalawigan, Joey G. Pelaez.

Sa misunod nga mga adlaw, usa ka forum ang gipasiugdahan ni Sangguniang Bayan (SB) Member, Hon. Dante D. Roble, Sr. samtang usa ka cooking demonstration ang gipangunahan ni Opol Women’s Federation President, Ms. Editha Z. Pitogo.

Sa laing bahin, miduyog sa maong kasaulogan ang Igpit Women’s Federation inubanan ni Brgy. Kagawad, Hon. Debbie V. Pereyra pinaagi sa usa ka tree planting activity didto sa Youngsville Subdivision, Brgy. Igpit kauban ang maabtik nga women president gikan sa lainlaing mga sona sa maong barangay.

Ang kababayen-an sa Opol mipadangat sa ilang pasalamat ngadto sa pamunoan ni Mayor Seno ug kang SB Member and Chairperson on Women and Family, Hon. Elizabeth Y. Tangub sa padayon nga pagpangga sa sektor sa kababayen-an.

Sa ingon pa ni Mayor Seno, “magpadayon ang panggamhanan sa lungsod sa Opol sa paghatag bili sa women’s sector ug sa pag ila sa ilang mga kalamboan.” #

✍📷Mardylene E. Mahistrado

📷 Opol MSWDO; Opol MENRO; Hon. Eliezer A. Vacalares, Jr.