Returning OFWs Mipailalum sa Programs and Services Orientation

Adunay mga ahensya sa gobyerno nga mipatigayon og mga oryentasyon ngadto sa Opolanong Overseas Filipino Workers (OFWs). Kini naglangkob sa mga programa ug serbisyo alang ngadtong OFWs nga mibalik sa atong lungsod.

Marso 5, 2021 – kauban ang 40 ka Opolanong OFWs inubanan sa pagdumala sa Overseas Workers Welfare Administration (OWWA) – Regional Welfare Office No. 10 ug ang National Reintegration Center for OFWs (NRCO) nga gipahigayon didto sa 2^nd Floor, Opol Public Market, Brgy. Taboc.

Sa maong kalihokan, gisangkapan ang OFWs sa maayong panglantaw bahin sa pagnegosyo pinaagi sa pagpasabot sa kamahinungdanon sa pagtigom ug sa pagdasig kanila nga mamuhonan.

Abril 21, 2021 – gidumala usab sa OWWA ang panagpulong mahitungod sa Tulong Pangkabuhayan sa Pag-unlad ng Samahang OFWs (Tulong PUSO) didto sa Legislative Hall sa balay-lungsod.

Kini usa ka hinabang pinaagi sa pagsangkap og mga materyales, galamiton, ug uban pang mga serbisyo ngadto sa OFWs nga nagtumong sa pagsuporta, pagpamaayo, ug paglig-on sa mga proyekto kun buluhaton kalabot sa panginabuhian.

Ang maong mga kalihokan nagmalampuson sa pakigtambayayong sa Lokal nga Panggamhanan sa Lungsod sa Opol pinasiugdahan sa Public Employment Service Office (PESO). Si Municipal Mayor, Hon. Maximino “Max” B. Seno dako og pasalamat ni PESO Manager-Designate, Ms. Odette P. Galangke ug sa tanang personahe nga kanunay miabag sa LGU diha sa pagtubag sa mga kinahanglan sa Opolanong OFWs ilabi na niining lisud nga kahimtang.

Ingon man, gidayeg sa amahan sa lungsod sila si OWWA-10 Regional Director, Petrona M. Bergado; OWWA-10 Reintegration Unit Head, Richie James G. Uy; Department of Labor and Employment (DOLE) -X NRCO Focal Person, Marry Gil A. Damasing; ug Reggae Simeone R. Torres sa DOLE-X sa ilang gihatag nga higayon aron mapalambo ang kahanas ug potensyal sa atong OFWs alang sa lungsuranon nga pag-uswag. #

✍ Ethel Rae Callo-Reyes

📷 Opol PESO, OWWA-X