Mayor Max B. Seno Gipasidunggan sa 2nd Mindanao Governance and Leadership Excellence Award

Gidawat ni Municipal Mayor, Hon. Maximino “Max” B. Seno ang pasidungog isip Most Outstanding Mindanaoan in Excellent Governance and Leadership for the LGU Municipal Executive Category sa gipahigayon nga 2^nd Mindanao Governance and Leadership Excellence Award (MGLEA) niadtong Nobyembre 20, 2020 didto sa Centrio Mall, Claro M. Recto Avenue, corner Corrales Avenue, Cagayan de Oro City.

Ang nasangpit nga kalihokan nga gi-organisar sa Mindanao Daily News ug sa Businessweek Mindanao nagtumong nga mahatagan og angay nga pag-ila ang mga lider sa gobyerno ug sa pribadong sektor nga naghatag kabag-uhan ug nagpakita sa labing maayong buhat sa ilang tagsa-tagsa nga mga komunidad ug kapunungan.

Si Mayor Seno giisip ang maong takna nga makasaysayanong panghitabo sa iyang kinabuhi diin garbo niya nga madawat kini nga pasidungog alang sa tanang Opolanon.

“Akong labing dakong pagpasalamat sa makugihon nga mga kawani sa LGU-Opol nga gipangunahan sa ilang tagsa-tagsa nga Department Heads alang sa ilang walay katapusan nga paningkamot ug pag-abag sa pagpatuman sa atong mga proyekto, programa, kalihokan, ug serbisyo.”

Sa dugang siya miingon nga kini nga pag-ila gipaabot ug gipaambit usab niya ngadto sa Sangguniang Bayan (SB) alang sa ilang tinuoray nga pagsalig ug pagsuporta sa tanang mga programa alang sa kaayohan sa tanang Opolanon.

Gipadayag usab sa amahan sa lungsod ang iyang takus nga pasalamat sa tanang mga Opolanon alang sa padayon nga pagsalig sa iyang pamunoan. Sa iyang nahabiling termino, magpadayon ang mga lakang aron matabangan ang katawhan ug magpabilin nga abli ang kasingkasing sa pagserbisyo sa publiko.

Sa laing bahin, giila usab sa maong kalihokan si President Rodrigo R. Duterte alang sa Administrative Category ug si Senator Christopher Lawrence “Bong” T. Go alang sa National Legislative Category diin ang mga plake gidawat ni Atty. Maricel R. Seno, Chief of Staff ni Presidential Spokesperson, Secretary Herminio “Harry” L. Roque, Jr. #

-Ethel Rae C. Reyes

Photos by Mr. Gerry Lee Gorit