Ayuda sa Pandemya Gitunol sa Kapulisan

Ang Opol Municipal Police Station (MPS) ubos sa pagdumala ni Police Major (PMAJ) Ian G. Borinaga, Officer-In-Charge (OIC), misuporta sa “Kapwa Ko, Sagot Ko!” Adopt a Family Program sa Philippine National Police (PNP).

Kini usa ka inisyatibo aron sa pag-abag sa Social Amelioration Program sa gobyerno diin katuyoan niini nga masuportahan ang mga pamilya nga labaw nga nanginahanglan diri sa atong lungsod ilabi na karon sa panahon sa pandemya.

Sa lokal nga lebel, ang Opol-PNP pinaagi sa Higalang Pulis Rolling Stall mi-abag sa pipila ka mga pamilya ning lungsod pinaagi sa paghatag kanila sa mga pagkaon, grocery items, ug pinansiyal nga tabang.

Gikan sa Nobyembre 9 hangtud Disyembre 21, 2020, adunay 123 ka indigenous families nga sa kinatibuk-an adunay 677 family members gikan sa Brgy. Bagocboc; Brgy Cauyonan; Sitio Malingin, Brgy. Igpit; Sitio Tulahon, Brgy. Malanang; ug sa Landless, Zone 7, Brgy. Barra ang natabangan.

Sa pagpadayon sa maong gawi sa umaabot nga bag-ong tuig, si PMAJ Borinaga mihangyo sa tanang mga Opolanon nga ipahayag ang atong gugma alang sa nasud ug ipatuman ang bayanihan pinaagi sa pagtabang sa atong isig ka-Opolanon. #

-Cuinee E. Samporna