Ang lokal nga panggamhan sa Opol pinaagi sa Municipal Agriculture Office (MAO) mipahigayon sa usa ka pagbansay-bansay kabahin sa Urban Gardening niadtong Hulyo 27, 29 ug 31, 2020 didto sa Zone 7B, Youngsville Subdivision, Igpit, ning lungsod.

Kini alayon sa Programa sa Department of Agriculture (DA) nga mao ang Plant! Plant! Plant Program aron adunay malahutayon ug igo nga suplay nga pagkaon sa matag panimalay.

Katuyoan usab sa maong kalihokan ang paghatag sa sakto nga teknolohiya ngadto sa 20 ka volunteers sa Barangay Igpit nga mamahimo usab nga magtudlo kabahin sa pagpananum sa mga utanon ngadto na sa ilang tagsa-tagsa ka mga sona.

Anaa isip mamumulong sa maong pagbansay si Ret. Col. Honororio S. Cervantes, usa ka malampusong mag-uuma nga nag adbokasiya sa Organic Agriculture ug ingon man usab tag-iya sa usa ka Learning Site nga Square Foot Garden nga nahimutang sa Pagatpat, Cagayan de Oro City.

Mipadangat sa iyanga dakong suporta si Municipal Mayor, Hon. Maximino B. Seno ngadto kang MA-Designate Sarah O. Abella sa pagsangkap sa mga partisipante gikan sa pagpreparar sa yuta nga pagatamnan hangtud sa pag-ani ug sa dugang siya nanghinaot nga mapa-uswag pa ang atong pagpanguma. #