LGU-Opol Miduyog sa Philippine Environment Month 2020

Agi og pagsaulog sa Philippine Environment Month kada tuig sa bulan sa Hunyo nga gi-aprobahan sa kanhi Presidente sa Pilipinas nga si Corazon C. Aquino pinaagi sa Proclamation No. 237 niadtong April 4, 1988, ang lokal nga pangagamhanan sa Lungsod sa Opol misalmot ug miduyog sa maong kalihokan aron sa pag-awhag sa pag-amping sa atong palibot ug kinaiyahan nga maoy ga-sustener sa tanang matang sa kinabuhi sa atong planeta.

Sa lokal nga bahin, agi og paghatag bili sa atong natural resources nga mihatag kanato og kapuslanan sa daghang mga tuig, gipangunahan sa Municipal Environment and Natural Resources Office (MENRO) ang lain-laing mga kalihokan ubos sa tema ning tuig nga “Protect Nature, Sustain our Future.”

Hunyo 6

Mipahigayon og Opol Lighthouse Volunteer Housekeeping pinaagi sa pagpintal sa parola ug sa paglimpyo sa Marine Sanctuary sa Brgy. Luyong Bonbon sa kolaborasyon sa Philippine Coast Guard (PCG) nga gipangulohan ni Gregorio I. Adel, Jr., Misamis Oriental Station Commander ug sa Coast Guard Auxiliary District Northern Mindanao (CGADNM) 1001st PCGA Squadron nga gipangulohan ni Director Commodore Rey Peter B. Gille ug Capt. Arthur Mencius B. Quiblat. Misaulog usab og cleanup drive ang maong organisasyon agi og suporta sa atong Environment Month Celebration sa tibuok Pilipinas.

Hunyo 11

Mipahigayon og clean-up drive sa Calinob Creek sa Brgy. Taboc. Kini usa ka hiniusang proyekto sa Department of Environment and Natural Resources-Environmental Management Bureau (DENR-EMB) -10 ug sa LGU-Opol nga mao ang Adopt-A-Estero/ Creek Program. Sa pagtutok sa maong programa, walay disposable masks, mga gwantes, tissues, ug uban pang Personal Protective Equipment (PPE) nga gikonsiderar nga special wastes ang giingon nga gilabay sa maong dapit.

Hunyo 16

Mihatag og Certificates of Appreciation ngadto nila ni Tarcisio A. Sarong, Jr., Tom Simone Jerry, Ernesto M. Ordaniza, Heldo R. Baluran, Roberto S. Anog, Alex R. Delos Santos, Nora Q. Cabatan, and Nevel B. Biaten, alang sa ilang bililhon suporta ug kontribusyon sa Environmental and Ecological Protection sa WHEELS Program, labi na sa Solid Waste Management Enforcement. Ang nasambit nga mga boluntaryo gikan sa RAGSON Team nga usa ka grupo sa mga tawo, Barangay Tanod, Barangay Peacekeeping Action Team (BPAT), ug mga sektor nga andam moserbisyo ug mosuporta sa kahusay ug kalinaw sa munisipyo, partikular na sa Malingin, Igpit.

Hunyo 19

Mipahigayon og tree growing activity sa Makaluesa Reforestation Project Area sa Makaluesa, Brgy. Patag diin sa pakigtambayayong sa CENRO-Initao nga girepresentahan ni Mr. Ronelo Abad, 50 ka seedlings sa narra ug mahogany nga natanom.

Hunyo 30

Mipahigayon og tree growing activity sa Makaluesa Reforestation Project Area sa Makaluesa, Brgy. Patag diin sa pakigtambayayong sa ENRO-Misamis Oriental nga girepresentahan ni Engr. Prisco Valmoria ug sa Barangay Council sa Brgy. Patag pipangulohan ni Punong Barangay, Hon. Hermito B. Laid, Jr. diin 150 ka forest seedlings ang natanom.

Si Municipal Mayor, Hon. Maximino B. Seno kanunay nga nagpahinumdom ug miaw-hag nga mosuporta ug aktibo nga moapil sa pagprotektar, pagpalambo, ug pag-uswag sa atong palibot ug kinaiyahan aron nga magpadayon pa kini ug maabtan pa sa umaabot nga henerasyon. #

-Engr. Randolph Q. Hallasgo

Photos by Opol Municipal Environment and Natural Resources Office