OCCians Nahimong Finalists sa JICA Video Blog Contest

Lima ka mga estudyante sa Bachelor of Science in Business Administration (BSBA) sa Opol Community College (OCC) ang nalakip sa Top 12 sa pinakauna nga Video Blog Contest nga gipahigayon sa Japan International Cooperation Agency (JICA).

Ang video blog (vlog) nila ni Fritzi Joy C. Mandin, Ray Anthony Vacalares kauban ni John Paul V. Elbambo nga “Non-Handicapping Environment” mihulagway sa epekto sa mga proyekto sa JICA ngadto sa atong Persons with Disabilities (PWDs).

Samtang ang vlog entry nila ni Senaira M. Bagaram ug Lara Mae R. Baculio nga “JICA’s Project in Tagoloan” nagpakita sa epekto sa Flood Risk Management Project for Tagoloan River ngadto sa mga tao nga nagpuyo duol sa nasangpit nga suba. Ang tanang finalists nakadawat og award certificate ug gihatagan sa higayon nga ipakita ang ilang vlogs sa JICA YouTube channel ug Facebook page.

Matud pa ni Mr. Yoshio WADA, Chief Representative sa JICA Philippines, makapadasig ang tanang entries gikan sa mga estudyante sa nagkalain-laing unibersidad ug mga batan-on nga mga propesyonal. Naghatag usab kini og bag-ong panglantaw kalabot sa relasyon sa Pilipinas ug sa Japan. Ang JICA nagplano nga makahatag pa og mga dugang pamaagi aron ang mga kabatan-onan makapadayag sa ilang mga huna-huna ug mga kaagi.

Ang paghimo sa maong vlog maoy nahimong usa sa mga rekisitos sa 1^st year BSBA nga mga estudyante nga nagkuha sa subject nga The Contemporary World niadtong una nga semester sa School Year (SSY) 2019-2020.

Alang sa dugang kasayuran mahitungod sa maong vlog entries, mamahimong mubisita niini nga links:

• Non-Handicapping Environment — https://www.youtube.com/watch?v=Fl1jGvHszbk&feature=youtu.be
By Fritzi Joy C. Mandin and Ray Anthony Vacalares
• JICA’s Project in Tagoloan — https://www.youtube.com/watch?v=OWYZYDgFrFg&feature=youtu.be
By Senaira M. Bagaram and Lara Mae R. Baculio #

—Enn Meriell L. Largo

Photos by Opol Community College