Dugo ko, Kinabuhi mo

Ang Opol Municipal Health Center and Lying-in Clinic inubanan sa Northern Mindanao Medical Center Blood Center nagpasigayon sa Mobile Blood Donation Activity niadtong Pebrero 10, 2020 sa Barangay Luyong Bonbon Covered Court.

Kini nga kalihokan gimugna sa LGU-Opol matag tulo ka bulan sa nagkalain-laing mga barangay sa lungsod aron maawhag ang mga Opolanon sa importansya sa regular nga pag donar og dugo ug masiguro nga anaa kini kon adunay manginahanglan.

Nahimo kining malampuson pinaagi sa partisipasyon sa cuarenta y dos (42) nga boluntaryong midonar sa ilang dugo ug gumikan na usab sa mga empleyado sa SCPA, health workers, Barangay Council ug uban pang katawhan sa maong barangay.

Gipasigarbo sa Luyong Bonbon Barangay Council pinangulohan ni Punong Barangay, Hon. Roland A. Alfeche, nga ang ilang partisipasyon sa maong kalihokan gapamatuod sa ilang dakong suporta sa adbokasiya sa Republic Act No. 7719 kun ang National Blood Service Act of 1994.

Ang maong balaod adunay tumong ug tinguha nga makabaton kita og igo nga kadaghanon sa dugo nga direkta ug kanunay sa panahon nga magkinahanglan ang matag Pilipino.

Mapasalamaton si Municipal Mayor, Hon. Maximino B. Seno sa tigpasiugda nga mao sila si Municipal Health Officer, Dr. Emily Grace G. Banal ug Blood Coordinator nga si Ms. Jovie A. Sabellina. #

— April Grace C. Castro

Photos by Jovie A. Sabellina