Opolanon Gikoronahan nga Miss Kuyamis 2020

Niadtong Enero 6-11, 2020 gipahigayon sa tibuok probinsya sa Misamis Oriental ang 7^th Kuyamis Festival ug ang 90^th founding anniversary niini.

Subay sa maong okasyon, adunay mga programa nga gipahigayon sa probinsyal nga panggamhanan sama sa Kuyamis Festival Dance, Kuyamis Booth Competition,  Association of Tourism Officers of Misamis Oriental (ATOM) Festival Night, Queen of Misamis Oriental, ug ang Miss Kuyamis 2020.

Sa milabay nga Miss Opol 2018, ang gikoronahan isip 1^st Runner-Up nga si Ms. Isobel June Teaño mao ang nahimong representatanti sa Lungsod sa Opol alang sa Miss Kuyamis 2020.

Sa maong indigay gipakita sa maong Opolanon ang iyang kaanyag ug malabtik nga salabutan ngadto sa mga hurado diin siya usab ang napili nga Best in Swimsuit ug Best in Evening Gown.

Mapasalamaton kanunay si Municipal Mayor, Hon. Maximino B. Seno tungod kay dakong garbo sa lungsod nga gapatigbabaw ang abilidad ug kaanyag sa mga Opolanon ilabi na sa beauty pageantry.

Sa Coronation Night nga gipahigayon sa El Salvador City Gymnasium niadtong Enero 9, nasakmit sa Opol ang korona sa pinaka una nga higayon.

Sa pagkakaron, si Ms. Teaño nagpahigayon sa iyang mga katungdanan isip Tourism Ambassadress sa Misamis Oriental. Uban niana siya nangandam alang sa umaabot nga indigay sa tibuok nasud diin siya ang mamahimong representanti sa atong probinsya. #

— Kim S. Lazo

Photos by Phillip C. Vallespin; Opol-Tourism