Mga Iskolar Mihuman sa EIM NC II

Mikabat sa 99 ang malampusong nakahuman sa 196 ka oras nga bokasyonal nga pagbansay sa Electrical Installation and Maintenance (EIM) National Certificate (NC) II sa Opol Community College (OCC) ning tuig. Gipahigayon ang ilang gradwasyon niadtong Nobyembre 22, 2019 sa Opol Multi-Purpose Gym sa Poblacion, Opol, Misamis Oriental.

Ang tanang nakahuman mga iskolar sa Technical Education and Skills Development Authority (TESDA) ubos sa ilang mga programa nga Training for Work Scholarship Program (TWSP) ug ang Universal Access to Quality Tertiary Education (UAQTE) diin nahilakip sa free technical vocational education and training ang libre nga pagtungha, mga galamiton sa pagbansay ug ang pagkuha sa national assessment.

Gawas pa niini, ang mga iskolar sa UAQTE adunay Php 160.00 nga adlaw-adlawng tagana, inubanan sa tulo ka T-shirts, ug mga libro.

Gipasidunggan ang pipila ka mga iskolar nga pinakamaayo sa matag batch:

TWSP – Carlito G. Virador

UAQTE Batch 1 – Ariel P. Osorno

UAQTE Batch 2 – Mark J. Jongoy

UAQTEE Batch 3 – Brian R. Magriña

Nakadawat usab ug pasidungog si Ely P. Mabao alang sa iyang makapadasig nga dedikasyon nga madugangan ang iyang kahibalo taliwala sa iyang edad nga 68.

Sa iyang mensahe, gi-aghat ni Misamis Oriental TESDA Provincial Director Miraluna B. Lopez ang mga migradwar nga pagakab-oton ang ilang mga damgo sa kinabuhi ug mopadayon sa pagdugang sa ilang kahibalo pinaagi sa pag-apil pa sa uban pang mga bokasyonal nga pagbansay.

Sa kabahin sa mga iskolar, sila mapasalamaton sa TESDA, sa OCC, sa ilang trainer ug sa LGU-Opol sa oportunidad ug sa dugang kahibalo nga ilang nakuha tungod kay magamit kini nila sa ilang panginabuhian. #

– Enn Meriell L. Largo