MAO Gipangunahan ang Farmer Field School on Cacao Production

Nagmalampuson ang 16 ka semana nga pagtuon sa mga mag-uuma sa Cacao Production nga gipahigayon didto sa My Only Way, Inc. (MOWI) Farm sa Sitio Basac, Bagocboc nga gidumala ni Mr. Alejandro Paloma.

Ang maong kalihokan milungtad gikan sa Hulyo 3 hangtod na sa Oktubre 23, 2019. Adunay 31 ka mag-uuma nga milahutay sa senemana nga sesyon nga gipangunahan sa Municipal Agriculture Office (MAO) sa pagpangulo ni Ms. Sarah O. Abella, Municipal Agriculturist-Designate.

Pinaagi ning inyong High Value Crops Development Program (HVCDP) Coordinator uban sa pagsuporta sa Agricultural Training Institute-Regional Training Center 10 (ATI-RTC 10), nagmalampuson ang graduation ceremony niadtong Nobyembre 6 didto sa Mindanao Enduro Park, Bagocboc.

Gihimo ang Farmer Field School (FFS) on Cacao Production inabagan sa kapin kon kulang Php 35,000 nga pondo sa tumong nga mahatagan og dugang kahibalo ang mga mag-uuma sa mga bag-ong teknolohiya sa pagpananom sa cacao nga usa sa prayoridad nga mga tanum nga gihatagan og pagtagad sa Department of Agriculture (DA) alayon sa tinguha nga makunhoran ang kapobrehon ug makahatag dugang kita sa mga mag-uuma. #

–  Mailyn C. Quiblat